رئيس الوزراء يكشف السبب الحقيقي لزيادة سعر البنزين 2 جنيه مرة واحدة ويزف بشرى

علَّق الدكتور مصطفى مدبولي، رئيس مجلس الوزراء على موضوع تسعير البنزين والوقود، قائلًا: "احنا جايين من بعيد أوي، ففي فترة كورونا لم نزد الأسعار، وتحملنا أعباء بالاقتراض كي لا نزيد الأسعار، على أمل تكون مؤقتة".

وأضاف مدبولي، خلال المؤتمر الصحفي لمجلس الوزراء، الأربعاء،: والحال أن الهيئة العامة للبترول، أصبحت تتحمل أعباء مالية هائلة، كان لازم نتحرك بصورة عشان نرجع للهيئة جزءًا كي تكمل. السعر غير مرتبط بسعر خام برنت.. لأ، مرتبط بحاجات كتير، عملنا إيه؟ كان هدفنا نرجع جزءًا لهذه الهيئة قبل نهاية 2025، عشان تقدر تعمل شغلها.. طب احنا بنسدد منين مستحقات الشركات الأجانب؟ من موارد الهيئة، ولما مقدرناش نسدد، فالشركات انسحبت، والإنتاج قلّ، ودلوقتي الشركات رجعت، والإنتاج زاد، وبيقلل الاستيراد، والإنتاج بيزيد، وده بيضمن استمرار الخدمة، كنا في منتهى الشفافية في هذا الأمر.

وتابع مدبولي: ولمّا استشرنا الخبراء نزود جنيه، وأرجع بعد 3 شهور أزود جنيه؟ قالوا لأ، عشان ده بيزود التضخم، كل الخبراء قالوا لو هتفضل تمد في الزيادات يؤدي إلى انخفاض التضخم لأماد أبعد، كل الاقتصاديين بيقولوا هذا في الغرف المغلقة، خُد القرار مرة واحدة، عشان تقدر تحس بالنتائج.

واستطرد مدبولي: طب فيه سيناريو نحط 6 أو 7 جنيهات في اللتر مرة واحدة؟ لأ ده هيخلي سعر الحاجات يزيد جدًّا، مع هذه الإجراءات لن يكون فيه احتياج لأي زيادات لمدة سنة كبيرة.. وصلنا للتوازن النسبي، عشان نمكن التسعير التلقائي سواء الزيادة أو النقصان، وهيكون متاح السعر يقل، وكان فيه اجتماع غير معلن مع الغرف التجارية قبل هذه الزيادة، وطلبت منهم مايكونش فيه زيادات.