وكشف إبراهيم حسن عن تفاصيل صادمة من رحلة معاناته مع أمراض القلب، والتي وصلت إلى حد تهديد حياته أثناء خضوعه لعملية جراحية معقدة، وجاء ذلك في رسالة مؤثرة حملت نبرة غضب من الانتقادات والهجوم الذي يتعرض له الجهاز الفني للمنتخب.
وكتب إبراهيم حسن عبر صفحته الشخصية بموقع "فيس بوك": "اتقوا الله في مصر ليه عاوزين تكسروا فرحة الناس الطيبة والأطفال اللي رجعوا يحفظوا تيشيرت وشعار منتخبهم وألوان علم مصر، اسألوا المصريين المغتربين عن أطفالهم اللي كانوا قربوا ينسوا ألوان وشكل علم بلدهم افتكروا لمة الشعب وفرحتهم أثناء وبعد كل مباراة، افتكروا احترام العالم كله لمنتخب مصر".
وتابع: "افتكروا حسام حسن المخلص والمحب لبلده اللي بينتحر علشان يفرح بلده من منا بلا أخطاء ولا ابتلاء في حياته؟.. ورغم كل ظروفه الخاصة لديه عمله واسم بلده وبيفصل وبيرمي كل حاجة ورا ضهره ليه بنتحارب بالشكل ده عند كل موقف ليه قبل كل معسكر بيتعلن علينا الحرب الشرسة دي؟".
وأضاف: "ليه الغل من زمايل لينا كنا بناكل في طبق واحد وكنا حاملين شعار واحد وهو علم مصر، ليه الغل من معظم الإعلاميين والحرب والهجوم غير المبرر في كل صغيرة وكبيرة والتقليل من أي نجاح بنعمله، ليه بنكبر الصغير على الكبير وبننسى الأصول اللي الشعب المصري متربي عليها".
واستكمل: "نصيحة ورسالة للزملاء اللي نفسهم يبقوا في مكانه، نجاحنا أنا وحسام هو اللي هيديك الفرصة بعد كده تبقى موجود مكانه علشان اللي بياخد القرار يبقى مطمن من تجربتنا ويديك فرصتك وميخافش وننسى الأجنبي لكن أنا لو فشلت مش هتجيلك".
وأردف: "معلومة مكنتش عاوز أقولها.. هل تعلم أن حسام أصيب أكثر من مرة أثناء المعسكرات والمباريات والتصفيات بذبحة واتلحق بالصدمات في آخر لحظة وبعدها بفترة صغيرة عمل دعامات وبعدها بشهر دخل غرفة العمليات تاني وقالوا ساعة علشان يضحكوا عليا".
واستطرد: "فضلت منتظره يطلع من غرفة العمليات وقعدوا يقولوا أي حاجة علشان متخضش والحمد لله طلع وبرضه مقدرش ايه سبب المدة دي كلها، بعدها بأيام روحت المستشفى أعمل تحاليل عادية قابلت الدكتور بالصدفة اللي عمل العملية قالي كنت مخبي عليك سبب التأخير إن حسام بنسبة كبيرة مكانش هيطلع من غرفة العمليات عايش".
وأوضح: "وده لأن العملية كانت في شرايين القلب وكانت معقدة جدا ومن المواقف مباراة البرازيل.. بعد العملية مكانش قادر يمشي ولا يقف وكان الوضع صعب عشان الكاميرات واللاعيبة ميحسوش بحاجة ويأثر عليهم معنويا قولتله يقعد وأصر يقف على الخط".
واختتم: "كل التفاصيل دي محدش كان يعرف عنها حاجة حتى اخواتي غير الدكتور محمد أبو العلا وطاقم الدكاترة في المستشفى.. معلش دي فضفضة من كتر الجحود والحروب اللي احنا شايفينها أنا وحسام بس مش هيقدروا يوقعونا ولا يوقفونا عشان مصر تستحق التضحية دي مننا".